Berikut ini kutipannya;
Assalamu 'alaikum wr.wb.
Innalhamda lillah nastainuhu wanastaghfiruhu, wanau dubillahi minsyururi angfusina, wamin syayyiati a'malina, mayyahdihillahu fala mudilalah wamayyudlilhu fala hadiyalah.
Ashadu alah iraha illalloh wa asyhadu ana Muhammadarosuululloh
Allahumma sholi ala sayidina Muhammad wa ala aliihi wa ashabihi ajmain.
Robisrohli sodri wayassirli amri wahlul ukdatam milisani yafkhohu kouli.
Amma bakdu.
Para Sesepuh-Pinisepuh ingkang dahat kinabekten.
Para Rawuh kakung putri ingkang kinurmatan.
Bapa Bambang Iswahyudi dalasan Ibu Ratna Sulistyowati ingkang minulya.
Minangka purwakaning atur sumongga kula derekaken manengku puja mewah ngunjukaaken raos syukur wonten ngarsa dalem Allah SWT, awit lumintuning barokah saha rahmat sahingga saget makempal wonten dalemipun Bapak Sugeng Suratno
Nuhoni keparengipun Bapak Sugeng Suratno sekalian garwa, kula minangka sulih sarira , keparenga matur:
Ingkang Sepisan : ngaturaken salam taklim pangabekti saking Bapa Sugeng Suratno sekalian Ibu Samilah dalasan sedaya kulawarga, katur dumateng Bapa Bambang Iswahyudi sekalian sakkulawarga, sinartan pepuji mugi panjenengan tansah winantu ing kawilujengan, pikantuk berkahing Gusti, Allah Ingkang Maha Mirah.
Kaping kalih ngaturaken wilujeng rawuh, mugi dipun sekecaken anggenipun pinarak lenggah.
Bapak Sugeng kala wingi sampun kepareng nderekaken ingkang putra ijab miturut satataning agami, nyuwun pangestu dumateng para tamu sedaya mugi anak kula Bagus Bondan Huda Prabawa saha kusumaning ayu Ferdina Ristananda anggenipun ngancik aneng alaming bebrayan kalis ing rubeda manggih suka basuki ingkang kaesti, saha dadoso kulawarga ingkang sakinah mawadah warohmah.
Wondene nuhoni pasrahipun Bapak Bambang, lumantar Bapak .... . Katampi Kanti asta kalih saha suka renaning penggalih. Ingkang putra kaaken, kagulawentah kadidene putra piyambak.
Wondene mbok bilih anggenipun nampi rawuh penjenengan wonten kiranging boja mewah krama Bapak Sugeng namun tumpah baludaging samudra pangaksama.
Wondene purnaning adicara penjenengan sak kadang ngersakaken kondur, Bapak Sugeng sak kadang, namung nderekaken wilujeng kondur mugi rahayu ngantos dalemipun sowang sowang.
Datan kekilapan Bapak Sugeng ugi ngaturaken panuwun ingkang tanpa pepindan dumateng sanak kadang, tinggi tepalih ingkang sampun paring panyengkuyung dumateng hajatipun Bapak Sugeng. Mugi sih kadarman penjenengan kacatet minongka amal sahe ingkang pikantuk piwales saking ngarsanipun Gusti Allah, ingkang sakalangkung ageng.
Pepuntaning atur mbok bilih anggen kula matur wonten gonyak ganyuking wicara ingkang biten nuju prana kulo ngaturaken jenang sela wader kalen sesoanderan ngapuranta sedaya kalepatan kulo.
Yu painten marut klopo, tuku kupat nang Sukomoro , cekap semanten atur kawula, menawi lepat nyuwun pangapura.
Wassalamu alaikum wr.wb.
Tidak ada komentar:
Posting Komentar