Alhamdulillah
Bapak Ibu Suratmi ingkang kulo bekteni.
Para pinisepuh para sesepuh ingkang mastuti dumateng pepoyaning kautamen
Para alim ulama Bapak Kyai Bapak Haji ingkang tansah sinanding wahyuning ilahi.
Para pangemban pangembating praja Para satriyaning negari ingkang tansah dados pandam pandoming kawula dasih ingkang pantes sinudarsono
Para tamu kakung putri trah baraya agung ingkang ambeg berbudi darmo.
Sakderengipun kulo ngaturaken menggah wigatosing pisowan kulo, keparengo langkung rumiyin kulo derekaken manengku puja mewah ngunjukaken raos syukur wonten ngarsa dalem Allah SWT . Inggih awit rumentahing barokah tuwin kawilujengan , satemah lampah kula hangirid panekaring penganteng kakung manggih rahayu wilujeng saking pringgabayaning margi.
Minangka purwakaning atur , kula kinen ngaturaken salam taklimipun Bapak Rahmad sak keluarga mugi katampi Ibu Suratmi sak kulawarga. Sumusul atur ingkang angka kalih , sowan kula saperlu anglarapaken sekar cepaka mulya sasele inggih pengantin kakung anakmas Bagus Muhammad Rizki Syahrullah putranipun Kakung Bapak Rahmad. Mugi ing mriki kaaken kagulawentah kadi dene putra piyambak.
Ugi katur para sanak kadang tangga tepalih minggahipun bebrayan Agung Beran Ngawi keparenga paring tambah wewarah dateng anakmas Muhammad Rizki Syahrullah ingkang anjog dateng karahayon.
Kajawi saking punika , minangka tangsuling katresnan, kula kinanthen sasana redana/ amplop tuwin ubarampe sawetawis , mugi katampia kanthi sula renanning penggalih , serta sageda nambahi raketing pasederekan anggenipun sami mangun bebesanan.
Mangke sak paripurnaning gati kula sak kadang kepareng nyuwun pamit mugi lampah kula tansah kalis saking pringgabayaning margi ngantos dumugi papanipun sowang sowang.
Selajengipun mbok bilih sowan kula sak kadang wonten ingkang kirangnujuprono kula tansah tumadah mbaludaging samudra pangaksama ingkang Agung.
Minangka panutuping atur , kula titah sawantah , tartamtu kathah kalepatan tuwin kekiranganipun. Awit saking punika , kiranging subasita mewah tumpangsuhing basa mugi kapendema wonten bumining pangapura.
Wabilahi taufiq wal hidayah wassalamu alaikum wr.wb
Tidak ada komentar:
Posting Komentar